2009 年 10 月 24 日 (六)

沒有婆婆的日子第 26 天

終於都送左婆婆上山啦！估唔到英雄飯都有成 28 人開足兩圍，你睇我地幾人強馬壯。

食完英雄飯，我地有部份人番左去禾輋坐下，大約四點半到就各自回家。

我見好攰，就約左肥 HAN 上去大陸揼骨，我地六點出發，換埋衫七點半到。

今次我專登搵左中醫師同我揼骨，估唔到中醫師真係按得咁到位，一按就鬆晒！

原來諗住趕火車番去香港，不過見時間緊迫，所以我地決定係大陸瞓一晚。

第二朝六點半我地就起身梳洗，跟住就搭火車番香港，大約七點鐘我就收到梓玲訊息！

梓玲我要多謝一路以來既慰問，你放心啦！我幫你同婆婆講埋架啦！

我會慢慢放低我婆婆既事，好好咁過我既每一天！

2009 年 10 月 19 日 (一)

沒有婆婆的日子第 21 天

婆婆今日係你三旬的日子，我地琴晚燒左好多金錢衣紙俾你，你收唔收到呀！

聽日係你舉殯既日子，我同四舅父同埋嫺姨會去威爾斯接你去殯儀館，你唔駛驚呀！

呢兩日我地都會陪住你，直至你安全上到山為止，你記得安心上路呀！

有咩需要記得報夢俾我地，我地一定會燒俾你架！

好啦婆婆！我聽朝一早要接你去殯儀館，所以我要早 D 瞓啦！有咩聽日再講啦！

2009 年 10 月 17 日 (六)

沒有婆婆的日子第 19 日

自從係威爾斯與你一別之後，就再冇見過你啦！婆婆，我真係好掛住你呀！

下個星期係你出殯既日子，我已經拎左大假，送你最後一程！

我曬左好多你生前既靚相同埋同我成長既生活照，等我可以掛住你既時候有得睇！

我亦預左一本俾你架，等你可以紀念我地！

我地聽晒你生前吩咐，將你火化，然後曬骨灰落海，不替你設靈位，等你自由自在！

我地幫你執左好多你生前鍾意既衣服及日用品，用黎做你既陪葬品！

我地係你頭七同回魂果日燒左好多野俾你，買左好多你鍾意既食物，你收唔收到呀？

好啦！係時候講下一 D 開心既野先！

早前我參加左一個歌唱比賽，今日 CHECK E-MAIL 時收到佢叫我 25/10 去初選！

心情有 D 緊張及開心，其實我當時諗住玩下，冇諗過佢真係會叫我去初選！

不過點都好，我會去試下既！因為我都係諗住玩下渣嘛！有好消息再通知大家！

2009 年 9 月 30 日 (三)

沒有婆婆的日子第一天

老實講，到呢一刻我仲未完全接受得到婆婆離世既事實。

雖然婆婆入院至逝世只係短短五日，不過佢既病情反覆得好緊要。

我記得 24/09 婆婆話唔舒服要去睇醫生，點知上到救護車時情況就突然急轉直下！

我趕到急救室時，醫生同我講，你最好叫埋你 D 屋企人黎睇下佢啦。

因為好多臨走既老人家都係咁呼吸，睇佢咁既呼吸方法，佢最多可以捱到三日。

我雖然預左婆婆會離開我，但係我真係冇諗過會咁快，我以為我可以好冷靜！

當我陪到佢上病房，知佢昏迷緊，醫生用電筒照左佢雙眼兩次都冇反應，我就開始喊！

姑娘見我咁喊法，就問我係佢邊位親人，跟住姑娘就話我知張太空被係幫婆婆保暖！

又話我知佢地已經叫左醫生黎睇佢，叫我唔駛擔心！醫生到左時荃舅母都啱啱到！

醫生話會俾個呼吸面罩婆婆戴，我知道後就講出婆婆既意願係唔用大面罩同插喉！

跟住舅母同醫生都尊重婆婆既意願，後尾我地全家都黎晒，坐晒係病房門口守候！

大約下午四時我地發覺婆婆身體開始回暖，仲出到成身汗，換衫時仲識得嗌痛！

後尾我地同婆婆講野，佢有番反應應我地，我地就知佢可以大步跨過！

見婆婆情況穏定落黎，我地守候到晚上十一點到，就各自回家休息！

第二朝番到公司我第一時間打上病房問婆婆最新情況，姑娘話佢完全清醒仲食緊早餐！

之後 Ann 姨去到探婆婆，話我知婆婆係度不停嗌肚餓，仲鬧妓娘唔俾佢食野添！

當然我聽到 Ann 姨咁講我真係好開心，因為婆婆有番力氣鬧人同食野嘛！

婆婆後尾仲打電話同我傾計，不過佢係咁重覆同我講佢就黎死、就黎死、就黎死。

我以為佢長氣所以冇理佢，之後同佢講你已經大步跨過，冇事既我放工會過黎探佢！

放左工我搭車去醫院，去到婆婆可能太攰冇咩點同我講野，不過佢有睜開眼望下我既！

我記得我臨走時仲鍚左婆婆一淡添！

星期六原本諗住放工去探婆婆既，不過見自己有幾聲咳就打算食藥休息下先。

食左兩次藥見病情冇好轉，就打俾荃舅父話佢知我感冒今日唔去探婆婆住！

就叫荃舅父、荃舅母探完婆婆俾電話我啦！佢地探完婆婆話我知佢情況又差左！

其實我都想去睇佢，不過醫生話我感冒菌好嚴重，要食抗生素，所以我唔敢去探婆婆！

去到星期日我聽見嫺姨同我講話佢又昏迷番，而且仲發緊燒，我真係有衝動想去探佢！

不過嫺姨知我感冒都好重，叫我等好番 D 先去探婆婆，唔係傳染病俾婆婆仲麻煩！

結果我星期六同星期日都唔可以去探婆婆，其實我係好唔開心，因為我想見下佢！

到星期一朝早我收到姑娘電話，佢話婆婆情況又差左，叫我地多 D 陪佢同探佢！

點知下午我收到醫生電話，話婆婆情況唔樂觀，叫我地做定心理準備，

婆婆一定過唔到中秋，只係捱埋呢一兩日。我聽完之後就 SEND 晒 SMS 俾屋企人！

因為我上司呢排放緊婚假，我唔可以成日離開大廈。

加上佢剛剛辦完囍事，我唔想影響到佢心情所以我冇話佢知我婆婆轉差既近況！

最後我同公司講頭先收到醫生電話話我婆婆情況唔樂觀，我想申請早半小時離開！

之後嫺姨就打黎話而家入去醫院睇婆婆，去到醫院我已經打電話俾舅公舅婆！

話俾佢地聽婆婆情況唔樂觀，佢地已經話辦好証件，明天一早黎醫院探婆婆！

嫺姨話聽日會去火車站接婆婆弟弟及弟婦，我同俾左嫺姨電話號嗎舅婆等佢地聯絡。

跟住我見婆婆指甲咁長就幫佢修剪下，荃舅母話今日好剪啦！唔係聽日剪唔到架啦！

其實我知道婆婆撐到今日都係為左見下個親生弟弟，因為要見既人婆婆之前都見晒！

我番到公司已經同公司講低，我午飯時間會早少少搭車去醫院探婆婆遲少少番大廈！

好多謝邨巴司機星哥車我去威爾斯，佢太太仲幫我手買飯盒！

去到我叫嫺姨及姨媽同舅公舅婆食飯先，我入去望左婆婆一眼就出去食飯！

食完個飯盒就坐左係婆婆隔離陪伴住佢，同佢傾左好耐計，

眼見婆婆個咀留血，我又幫佢個咀濕水，等佢個咀冇咁痛！

我記得我係太約下午二時三十分離開醫院搭車番大廈！

番到大廈唔夠一個鐘，嫺姨就喊住打電話俾我，其實我都心之不妙！

之後我知道婆婆已經逝世，我好冷靜執齊我要用既野搭的士去見婆婆最後一面！

我以為我可以好冷靜，但當我衝到入去病床時，見到婆婆冇左呼吸瞓係度！

我既淚水已經不停流左出黎，到果一刻我先知道自己係冷靜唔黎！

我傻到去聽下婆婆個心有冇跳，按下佢脈搏有冇郁，又度下佢個鼻睇下佢有冇呼吸，

但係當全部都係冇時，我個心好痛，我好唔捨得佢，我真係好想摇下佢睇下佢醒唔醒！

但係我知道我咁做其他人會更加難過，我知道婆婆唔想我唔開心，想我堅強活下去！

所以我強忍淚水行番出去！將我傷心既心情收起，去安慰其他屋企人！

等全部屋企人見完婆婆最後一面後，我地就一齊送婆婆到殮房門口。

番到屋企係 KEYNES、UNCLE、AUNTI 面前大家都有講有笑，

但當自己一個番到房，我就會聽住歌，將唔開心既心情完全釋放出黎，等自己舒服 D！

我明白人死不能復生，我亦知道婆婆走得好安詳！我會應承你我唔會俾自己傷心咁耐！

我只知道如果冇婆婆湊大我，就唔會有今日咁硬淨既我，婆婆我會為你好好咁活下去！

今日 ANN 姨、我、子進、阿CAT 番左去禾輋用紅紙封左個神臺，等婆婆可以番屋企！

我地一路執野，一路睇番以前影既相，我仲 KEEP 左一本黎留念添！

好啦！打到呢度先啦！我係時候要瞓覺啦！

2009 年 9 月 29 日 (二)

好耐都冇打過日記！估唔到打日記果日就係婆婆離我而去之時！我會永遠記得呢一日！

心入面有好多好深既感受同疑問，唔知點樣可以用文字去表達出黎，只愿你安息！

希望你去到一個無痛苦、無病痛既天國，你會永遠開心快樂！

我只記得係醫院，二舅父話阿婆鍾意聽陳百強既歌，所以播左好多佢既歌！

不過我聽得最多既就係一生何求呢首歌，我今晚聽左好多次，原來首歌係咁好聽！

去到呢一刻都唔知有咩好講！下次再講啦！